Sefydlwyd Cyfeillion Croesor yn 1998 fel mudiad cymdeithasol i wella diwylliant, economi ac amgylchfyd Cwm Croesor ac ardal Llanfrothen. 

Yn 2000 agorwyd siop pethau ail law, Siop Mela ym Mhenrhyndeudraeth, er mwyn codi arian at achosion lleol ac i gefnogi’r mudiad. 

Yn 2001 prynwyd adeiladau fferm Bryn Gelynnen er mwyn eu haddasu at ddefnydd y gymuned. Erbyn 2007 roedd Caffi Croesor a’r toiledau wedi eu hagor ac ymhellach ymlaen yn 2008 agorwyd yr Oriel. Erbyn hyn, mae Oriel Caffi Croesor yn cael eu ddefnyddio fel lle i bobl yr ardal gymdeithasu neu rhentu ar gyfer achlysuron preifat.

Mae yna lawer o ddigwyddiadau cymunedol yn digwydd yma gyda help gwirfoddolwyr grŵp Hwb Croesor, sydd hefyd yn cadw trefn ar yr ardd gymunedol ac yn cydlynu digwyddiadau codi pres.

Dros y blynyddoedd diwethaf, rydym wedi derbyn nifer o grantiau i gynnal digwyddiadau cerddorol a chelfyddydol, sesiynau ysgol goedwig i blant, gwneud gwaith atgyweirio hanfodol ar yr adeiladau a cyflogi busnes lleol i gynnal astudiaeth dichonoldeb ar ddefnydd gorau ein hasedau.

Mae Cyfeillion Croesor yn falch o gyd-weithio gyda menterau eraill yr ardal fel Menter y Ring, Plas Brondanw, Y Dref Werdd, Siop Mela, Cwmni Bro Ffestiniog, Deudraeth Cyf a Cyngor Llanfrothen.